Abayobozi b'amashuri Gatolika ya Diyosezi ya Kabgayi mu mwiherero

Ni umwiherero uteganyijwe kumara iminsi itatu. Ukaba urimo kubera muri Hotel Saint André Kabgayi. Ukaba uhuriyemo abayobozi basaga 200 b'amashuri y'iyi diyosezi mu byiciro bitandukanye.

Umuhango wo gutangiza ku mugaragaro uyu mwiherero witabiriwe na Bwana Mugenzi Ntawukuriryayo Leo, ushinzwe ishami ry'iterambere n'imicungire y'abarimu muri Ministeri y'Uburezi waje ahagarariye Minisitiri w'uburezi.

Padiri Habimana Germain, ushinzwe amashuri Gatolika muri Diyosezi ya Kabgayi atangiza uyu mwiherero yagarutse ku nsanganyamatsiko y'uyu mwiherero igira iti "Umuryango isoko y'uburezi bufite ireme". Avuga ko impamvu bahisemo iyi nsanganyamatsiko ari ukugira ngo bazirikane ku ruhare rw'umuryango mu burere n'uburezi bw'umwana.

Padiri Germain kandi yagarutse kandi ku bizakorwa muri uyu mwiherero harimo ibiganiro ku ngingo zitandukanye ndetse n'urugendo shuri ruzakorerwa muri Diyosezi ya Nyundo.

Yagize ati"Umuryango ufite umwanya udasimburwa mu burere bw'umwana, hanyuma mwarimu akaza yuzuza ababyeyi ku bijyanye n'ubundi bumenyi umwana akenera. "

Mu bazatanga ibiganiro harimo na Myr Balthazar Ntivuguruzwa, Umwepiskopi wa Kabgayi, uzageza ku bayobozi b'amashuri umurongo mushya wo guteza imbere uburezi muri Diyosezi ya Kabgayi.

Mu mibare yatanzwe na padiri Habimana Germain, igaragaza ko Diyosezi ya Kabgayi ifite amashuri y'inshuke 191 abarirwamo abana 22340; Amashuri abanza 102 abarirwamo abana 120117; Amashuri yisumbiye adacumbikira abanyeshuri 87 abarirwamo abanyeshuri 46125 n'amashuri yisumbuye acumbikira abanyeshuri 21 abarirwamo abanyeshuri 9997. Amashuri yose hamwe akaba ari 401 abarirwamo abanyeshuri 198579.

Uretse ubwinshi bw'amashuri n'abo arera Diyosezi ya Kabgayi ikomeje guteza imbere uburezi bufite ireme ku buryo mu mwaka ushize w 2021-2022, abanyeshuri bo muri Diyosezi ya Kabgayi batsinze ku kigero cya 86%.

Bwana Leo Mupenzi Ntawukuriryayo waje ari intumwa ya ministre yibukije abayobozi b'ibigo bya kiliziya gatolika ibipimo bitanu uburezi bufite ireme bushingiraho kugira. irimo kumenya Icyerekezo cy'ishuri, ntikibe ku bikuta gusa ahubwo abarezi abana n'ababyeyi babe babyibonamo. Kwita ku myigire n'imyigishirize, kwita ku ndangagaciro zijyanye no guteza imbere uburezi no kwibuka gukorana n'ababyeyi n'umuryango mugari.

Uyu mwiherero ubaye ku nshuro ya 10 kuko watangiye muri 2019.