Abayobozi b’amashuri ya Diyosezi ya Kabgayi basuye Diyosezi ya Nyundo

Mu Izina rya Diyosezi ya Nyundo, aba bayobozi bakiriwe na Padiri Léonidas Ngomanziza ushinzwe uburezi gatolika muri Diyosezi ya Nyundo, zone Pastorale ya Gisenyi.

Padiri Ngomanziza yatembereje aba bayobozi muri Cathedrale Notre Dame de l’Annonciation aho yabasobanuriye amwe mu mateka yayo ndetse n’Abepiskopi bayishyinguyemo uko ari babiri aribo Musenyeri Aloyizi Bigirumwami na Musenyeri Wenceslas Kalibushi.

Nyuma yo gutemberezwa muri Katederali ya Nyundo, Abayobozi b'amashuri Gatolika ya Kabgayi basuye Ecole d'Arts de Nyundo aho berekws ibihangano bitandukanye by’ubugeni bikorwa n’abanyeshuri biga muri iri shuri.

Mu rwego rwo gufasha Petit Séminaire saint Pie X Nyundo gukomeza kuzahuka mu ngaruka z'ibiza byayibasiye mu ijoro ryo Kuwa 2 rishyira ku wa 3 Gicurasi, abayobozi b'amashuri Gatolika ya Diyosezi ya Kabgayi bagejeje kuri iyi Seminari inkunga ya Toni ebyiri z'umuceri.

Urugendo rwakomereje muri Petit Seminaire Saint Pie X Nyundo aho banahaturiye Igitambo cya Misa cyayobowe n'umuyobozi w'iyi Seminari, Padiri Nyilibakwe Jean Bosco.

Muri iri shuri aba bayobozi basobanuriwe ingaruka iri shuri ryahuye nazo kubera Ibiza byibasiye Akarere ka Rubavu, by’umwihariko mu gace aya mashuri aherereyemo.

Mu ijambo rye, Umuyobozi w’iyi Seminari yashimiye abayobozi b’amashuri Gatolika muri Kabgayi kuba barahisemo kuza gusura iri shuri nyuma y’ibihe bikomeye ryanyuze.

Nyuma yo gutembera mu bice bitandukanye bya Nyundo abayobozi b'amashuri Gatolika ya Kabgayi bahawe ikiganiro ku ruhare rw’umuryango mu gutanga uburere buhamye. Ni ikiganiro bahawe na Padiri Ngomanziza Léonidas ushinzwe amashuri Gatolika muri Diyosezi ya Nyundo, zone ya Gisenyi wagitanze mu izina ry’Umwepiskopi wa Nyundo uri mu butumwa hanze y’igihugu.

Urugendo rw’Abayobozi b’Amashuri Gatolika ya Kabgayi, barusoreje i Kigufi aho batemberejwe ku ruganda rutunganya Gaz Metane mu Kiyaga cya Kivu.

Padiri Habimana yakomeje avuga ko intego y’umwiherero w’iminsi itatu uri kuba ku nshuro ya cumi ari ugushimira Imana ku byagenze neza, kurebera hamwe ibitaragenze neza no gufata ingamba z’umwaka w’amashuri 2023/2024.

Ati: “Twahisemo gusura Diyosezi ya Nyundo kuko ifte amateka akomeye ndetse n’amashuri menshi. By’umwihariko, twayihisemo kuko yagize Ibibazo byo guhura n’ibiza byashegeshe iyi diyosezi ndetse n’amashuri yayo. Mu rwego rwo kubagaragariza urukundo no kwifatanya n’amashuri yo muri iyi dyosezi, twakusanyije inkunga ya Miliyoni ebyiri, zifashishijwe mu kugura umuceri ungana na Toni ebyiri zo guha Seminar nto yitiriwe mutagatifu Pio X.”

Padiri Germain Habimana Umuyobozi ushinzwe amashuri Gatolika muri Diyosezi ya Kabgayi yatangarije Kinyamateka ko intego nyamukuru y’uru rugendo ari ukugaragariza urukundo Diyosezi ya Nyundo by’umwihariko amashuri yo muri iyi diyosezi nyuma y’ibibazo bikomeye by’ibiza yahuye nabyo.

Yongeyeho ko umusaruro w’umwiherero bakora ugenda ukomeza kugenda ugaragara mu bice bitandukanye birimo imitsindire, umuco, sport n’ibindi.

Ati: “Nk’ubu mu mikino ihuza amashuri yo mu bihugu byo muri Afurika y’Iburasirazuba (FEASSA), Diyosezi ya Kabgayi yari ifitemo amakipe atanu.”

Yasoje agaragaza ko bijyanye n’umurongo w’Umwepiskopi wa Diyosezi ya Kabgayi, umwiherero w’uyu mwaka ufite ingamba yo gukorera hamwe mu Kwita ku mwana, kwihutisha gahunda, ndetse no Kwita ku bibazo biba mu miryango kuko ari ryo shingiro ry’imitsindire y’umwana.

Nyuma y'uru ruzinduko abayobozi b'amashuri Gatolika ya Diyosezi ya Kabgayi basubiye i Kabgayi aho bagiye gukomereza umwiherero. Bikaba biteganyijwe ko bazawusoza kuri iki cyumweru tariki 3 Nzeri 2023.