Barashimira abayobozi n'abarimu b'Ishuri Saint Andre Gitarama rya Diyosezi ya Kabgayi

Kuwa kabiri, 27 Nzeri 2022, nibwo amanota y’abakoze ikizamini gisoza amashuri abanza n’icyiciro rusange yashyizwe ahagaragara. Mu mashuri abanza, abanyeshuri 227,472 bakoze, 206,286 bangana na 90.6% batsinze iki kizamini.

Umubyeyi wa ISEZERANO Forever Hyacinth bwana BIZIMANA Anastase Yatangarije Kinyamateka ko ashimira ubuyobozi n’abarimu bigisha kuri iri shuri ubwitange, ubuhanga ndetse n’umurava bagira mu kazi kabo kuko aribyo bituma iri shuri rikomeza kugira imitsindire myiza ndetse bikaba byaratumye umwana we aza ku mwanya wa mbere mu banyeshuri 227,472 bakoze ikizamini gisoza amashuri abanza mu Rwanda.

Yunzemo ko nk’ababyeyi baba bafite inshingano zo kuba hafi y’abana, bakabafasha kugera ku ishuri ku gihe, kubaha ibikoresho bakeneye, kubibutsa ko umwanya wo kwiga ari ngombwa ndetse no kubaha umwanya wo gukina kuko umusaruro udaturuka kuri mwarimu gusa ahubwo n’uruhare rw’umubyeyi ruba rukenewe.

Yasabye ubuyobozi gukomeza kureberera abana nk’uko bisanzwe ndetse no kureberera abarimu bo kuri iki kigo mu rwego rwo kwirinda kuzabatakaza kuko ari abakozi beza kandi batanga umusaruro.

Umuyobozi w’iri shuri rya St André Bwana TWAGIRUMIKUZA Holmisdace yatangarije Kinyamateka ko nabo bashimishijwe n’imitsindire y’abanyeshuri babo nk’ikimenyetso cy’ubufatanye hagati y’abarimu, ababyeyi, abanyeshuri ndetse n’ubuyobozi bw’iri shuri.

Yunzemo ko kuba muri iyi myaka St André Gitarama ikomeza kuza mu myanya y’imbere mu gihugu atari igitangaza kuko binyuze mu bufatanye hagati y’inzego zose muri iki kigo, abanyeshuri baba barateguwe neza dore ko nk’abanyeshuri biga mu mwaka wa 6 bongerwa isaha yo gusubiramo amasomo.

Yongeyeho ko ishingiro rya byose ari ikinyabupfura baha abanyeshuri bo kuri iri shuri. Yagize ati: “Turateganya ko binyuze mu kugendera ku igihe, imikoranire myiza, ubufatanye hagati y’abarimu, abayobozi n’ababyeyi ndetse no gukurikiza progaramu ya Leta, turizera neza ko iyi mitsindire myiza tuzayisigasira”.

Yakomeje kandi ashimira Ubuyobozi bwa Diyoceze iri shuri riherereyemo budahwema kuba hafi y’ikigo ndetse n’ababyeyi baharerera kuko uruhare rwabo mu burere bw’abana babo kuva mu rugo kugera ku ishuri ari rwo shingiro ry’imitsindire myiza muri iri shuri.

Bamwe mu babyeyi barerera muri iri shuri twabashije kuganira batangaje ko bashimira iri shuri kubw’uburere n’ubumenyi baha abana babo.

Uwitwa Vestine yagize ati: “Muri iri shuri igihe ni igihe, bafite ikinyabupfura gihambaye kandi abana bacu barabigaragaza iyo bageze mu rugo. Saa moya abana baba batangiye amasomo tukongera kubabona saa kumi n’imwe batashye”. Yakomeje avuga ko ingamba nk’ababyeyi bafite ari ugukomeza gufatanya n’ubuyobozi ndetse n’abarimu mu gufasha abana babo gukomeza guhaha ubumenyi n’uburere bufite ireme.

Ishuri ryaragijwe mutagatifu Andereya ni ishuri ryigenga rya Kiliziya Gatolika by’umwihariko Diyoseze ya Kabgayi, paruwasi ya St André. Iri shuri riherereye mu karere ka Muhanga, umurenge wa Nyamabuye hafi n’inyubako ikoreramo Akarere ka Muhanga.