Butare: Abayobozi b’ibigo by’amashuri gatolika barasabwa gusigasira ishuri gatolika rikaba igicumbi cy’amizero ubuvandimwe n’amahoro.

Iyi nama yayobowe n’umwepisikopi wa Diyosezi ya Butare yari igamije kurebera hamwe uburyo ishuri gatolika ryakomeza kuba igicumbi cy’amizero, ubuvandimwe n’amahoro.

Mu ijambo rye, Myr Jean Bosco Ntagungira yasabye abayobozi b’ibigo by’amashuri gatolika kugira urukundo rw’umurimo bakora, Kwishakamo urwo rukundo hagati yabo n’abo bakorana, urukundo rwitanga kuko rushobora no kukubabaza kandi rukaba rwanagushimisha. Yabasabye kugira iyo passion kandi bakayigeza kubo bakorana. Ati” Tugomba kugira (passion) urukundo rw’uburezi dukora. Ayo marangamutima akagaragara hose no kuri bose. Mukagira impanuro y’ubutabera, ubuvandimwe n’urukundo. Kandi mukarinda isura y’ishuri, ari nacyo ababyeyi bifuza.”

Mu kiganiro abayobozi b’ibigo by’amashuri bagejejweho na Docteur Soeur Marie Therese Mukabacondo umubikira wo mu muryango w’abenebikira, akaba yarabaye umurezi igihe kirekire mu minsi yashize. Yabasangije uko uburezi gatolika bwo hambere bwakorwaga, abasaba ko bagomba kurebera kuri Yezu Kristu bityo umurezi akaba agomba kuba intangarugero.

Yabibukije ko amashuri gatolika ari amashuri azwiho gutanga uburezi bufite ireme, bityo bigatuma n’ababyeyi baza ari benshi gushakira abana babo imyanya muri ayo mashuri. Yasabye abayobozi kudacika intege kubera ibibazo byinshi biri mu mashuri kuko na kera byahozeho, ahubwo ko bakiwiye kurangamira Kristu mu nshingano zabo. Ati” Kristu niwe ugomba kuba ishingiro ry’uburere n’uburezi butangwa mu mashuri gatolika. “

Yakomeje avuka ishuri gatolika rihamagariwe kuba igicumbi cy’amizero kuko kuri iki gihe abana bari ku ishuri bafite ibibazo byinshi.

Ati” Hari abana bafite ibibazo bishingiye ku miryango bavukamo itabanye neza, hari abana b’imfubyi badafite ababyeyi, abana bafite ababyeyi batandukanye bakaba barerwa n’abandi bantu. Abana batagira imyirondoro kubera ko bavutse ku buryo budateganyijwe. Ababyeyi basa nk’aho beguriye abana ibigo by’amashuri n’ibindi. Aba bana bose bakeneye kubonerwa ibisubizo bibarema umutima igihe babagannye bari mu ishuri gatoka, igihe basanze umuyobozi w’ishuri.”

Soeur Therese avuga ko hari ubwo tubona abana badashobotse ku ishuri, ariko impamvu ibatera kugira iyo myitwarire iri mu muryango wabo.

Ati” Mbere yo guhana umwana, umuyobozi agomba kumumenya akamenya n’ibibazo afite mu muryango, hanyuma akamuhanura. Umwana wageze mu biganza by’umurezi mwiza ntagomba kuvamo uko yaje, umurezi agomba gukora ibishoboka byose, umwana akabona iby’ibanze akeneye.

Soeur Marie Therese akomeza avuga ko abarezi bagomba kuba abantu batanga ikizere, kugira ngo ishuri gatolika ribe igicumbi cy’amizero koko.

Agira ati” Umwana ava mu muryango afite ibibazo byinshi byamuhungabanyije, ariko ishuri gatolika rigomba kumufasha kubisohokamo neza, akaba umuntu umeze neza. Abana bakenewe gutegwa amatwi mbere na mbere. Ariko kandi ababyeyi bakaba nabo bagomba kwibutswa uruhare rwabo kuko uburere bwa mbere ari mu rugo noneho ishuri rigakomerezaho.”

Yasabye abayobozi b’ibigo by’amashuri abasabye ubufatanye n’ ubwumvikane kuko ari ngombwa mu kazi kugira ngo be kuvuguruzanya.

Docteur Sr Therese yasoje avuga ko kurera bishoboka, yasabye abarezi gukunda ibyo bakora, gukunda abanyeshuri, kubatega amatwi kandi bagakora ibyo bashobora byose. Abayobozi b’ibigo by’amashuri barasabwa gutega amatwi y’umutima abantu bose bahura nabo mu kibuga cy’uburezi. Gukunda abanyeshuri, kubatega amatwi no kubafasha ibyo bashobora kubafasha.

Umuyobozi w’akarere ka Nyaruguru ushinzwe imibereho myiza y’abaturage Byukusenge Assoumpta agaruka ku nsanganyamatsiko y’uburezi gatolika muri Diyosezi ya Butare igira iti”Turangamiye Kristu , ishuri ryacu turigire igicumbi cy’amizero, ubuvandimwe n’amahoro. Yavuze ko iyobokamana n’uburezi byuzuzanya. Umurezi agomba kuba intangarugero mu byo yigisha. Yashimangiye gahunda yo gufata umwana wese nk’uwawe. Ati” Abarezi bagomba kugira urukundo rw’abo barera n’urw’umwuga bakora. Umuntu ufite urukundo ntiyatekera abana indyo ituzuye.”

Naho umuyobozi w’akarere ka Huyewungirije ushinzwe imibereho myiza y’abaturage Kankesha Annoncithe yibukije abayobozi b’ibigo by’amashuri gatolika ko Huye yahisemo gukomeza kuba igicumbi cy’uburezi. Yabasabye ubwuzuzanye, ubufatanye mu burezi bakora ,gusangira ibyiza bafite, kwigiranaho no kugirana inama .

Ati “Murasabwa kwitanga inshuro ebyiri, gukunda ibyo mukora, kunoza imikorere n’imikoranire no guteza imbere uburezi. Tujye inama tugishe inama kandi birashoboka dufatanyije. “

Vice Mayor Kankesha yibukije abayobozi b’ibigo by’amashuri gahunda yo guhanga udushya, gushinga club zo gufashanya mu mashuri hagamijwe kwishakamo ibisubizo bizafasha bamwe mu bana bafite ibibazo by’ubukene ku ishuri.

Yagize ati” Ubufatanye ni ingenzi, kugira inshuti z’uburezi n’abajyanama b’uburezi.kuko uburezi bwacu ari umuhamagaro urenze indi.”

Ku ruhande rw’abayobozi b’ibigo by’amashuri bavuga ko bishimiye iyi nama bagiranye n’umwepisikopi kuko bibafasha kunoza uburezi bakora.

Bayigira Emmanuel umuyobozi w’ishuri ribanza rya Sainte Famille Mukomacara yavuze ko ishuri rikwiye kuba igicumbi cy’amizero, aho umwana yumva yisanzuye kandi akahiyumvamo kurusha ahandi. Ati” Dusanzwe tugerageza kubana n’abana no kubafasha kuva mu bibazo batugaragariza, ariko uyu munsi tugiye kubinoza ku buryo burushijeho bijyana n’insanganyamatsiko tuzagenderaho muri uyu mwaka. Gutega amatwi abana cyane kurusha uko twabikoraga, kuba intangarugero kugira ngo abana turera bazadufatireho ingero nziza ndetse no gushaka ikintu cyose gikuza ubuvandimwe n’amahoro mu bana turera. “Emmanuel yavuze ko mu burezi bwa none harimo ibibazo byinshi , ariko nk’abayobozi bagomba gushakira umwana wese ubagannye igisubizo nk’uko mu kiganiro babigarutseho.

Mu bindi byagarutsweho mu nama y’uburezi yahuje abayobozi b’ibigo by’amashuri muri Diyosezi ya Butare, ni gahunda yo gutangiza ikigega cy’ubufatanye cy’uburezi mu rwego rwo gushyira hamwe no gushyigikirana mu mashuri (caritas scholaire). Iyi ngingo ikaba yarashyizeho komite izanonosora imikorere y’icyo kigega cy’ubufatanye bifuza ko cyatangira muri Diyosezi ya Butare.

Kugeza ubu Diyosezi ya Butare ifite ibigo by’amashuri gatolika bigera 162, birimo amashuri abanza n’ayisumbuye.