Diyosezi ya Byumba yageneye abangavu babyariye iwabo ibikoresho by’agaciro ka Miliyoni 10

Ibi bikoresho byahawe abangavu basaga 170, bigatangirwa muri Paruwasi ya Burehe iherereye mu Karere ka Rulindo, bigizwe n’ibikoresho by’isuku, ibiryo, imyambaro y’ishuri, amakaye, amakaramu, ibiribwa n’ibindi bifite agaciro ka Miliyoni 10.

Ni igikorwa cyitabiriye na Jutta Becker ukorera Missio Autriche ari na nayo yateye inkunga uyu mushinga.

Iki gikorwa kandi cyitabiriwe n’Umuyobozi w’Akarere ka Rulindo wungirije ushinzwe imibereho myiza y’abaturage, Theophile Mutaganda hamwe n’abayobozi b’imirenge igerwamo n’umushinga.

Mu kiganiro yagiranye na Kinyamateka, Padiri Jean Damascene Mudacyahwa, Perezida wa Komisiyo y’Ubutabera n’Amahoro muri Diyosezi ya Byumba yavu ze ko umushinga bawise Twugarire Turugarijwe kuko babonaga ikibazo cy’ubwiyongere bw’inda zidateganyijwe mu bangavu gikomeje gufata indi ntera.

Nk'uko yakomeje abivuga, abangavu batoranyijwe muri Paruwasi za Muyanza, Kinihira na Burehe zo muri Diyoseze ya Byumba.

Uretse kuba barabyariye iwabo, Padiri Mudacyahwa yavuze ko aba bangavu batoranywa n’imiryangoremezo hashingiwe ku kuba umukobwa ava mu muryango ukennye cyane cyangwa yarahejwe n’iwabo, ndetse no kuba afite afite imyaka mike.

Mu bakobwa 170 batoranyijwe gufashwa n’uyu mushinga, 60 muri bo bahisemo gusubukura amashuri asanzwe naho 108 bakomereza mu kwihugura mu myuga irimo ubudozi bw’imyenda, ububoshyi bw’imipira ndetse no gusuka imisatsi.

Nk'uko Padiri Mudacyahwa abigarukaho, abahisemo kujya mu mashuri asanzwe bagenerwa ibikoresho by’ishuri, imyenda, kwishyurirwa ifunguro kwishyurirwa ubwisungane mu kwivuza no kugura ifunguro ry’abana babo baba basigaye mu rugo.

Yagize ati “Mu rwego rwo kurinda ko abana barware bwaki, tugena amafaranga agura ibiryo byo kugaburira abo bana kuko ba nyina bo tuba twabishyuriye ifunguro ku mashuri.”

Ku rundi ruhande, abakobwa 108 bahisemo kwiga imyuga bo bahuguwe igihe kigera ku mezi arindwi biga ubudozi, ububoshyi bw’imipira no gusuka imisatsi.

Nyuma yo guhugurwa muri iyo myuga, bagenewe ibikoresho byo kwifashisha birimo amamashini, ibitambaro, ubudodo n’ibindi.

Nk'uko Padiri Mudacyahwa yakomeje abivuga, uretse gufashwa mu myigire kandi, aba bakobwa basaga 170 bashyizwe mu matsinda 18 yo kwiteza imbere binyuze mu bikorwa bitandukanye birimo ubucuruzi buciriritse, ubuhinzi, ubworozi, aho buri tsinda ryahawe amafaranga ibihumbi 500frw kugira ngo bazashobore gukomeza ubuzima mu gihe umushinga uzaba wararangiye.

Uyu mushinga uri ku musozo w’igihe cy’imyaka ibiri wari waragenewe, wakozwemo ibikorwa bitandukanye birimo gukusanya no guhuza abangavu batewe inda zidateganyijwe kuko bari bafite ibibazo byo kwigunga, kwiheba, guhezwa kubera ko akenshi abakobwa babyariye iwabo bakunze gucibwa mu miryango.

Ku bufatanye n’inzego za Leta, aba bakobwa kandi bafashijwe mu bikorwa bijyanye no kubashakira ubutabera.

Ku kijyanye n’ikoreshwaneza ry’ibikoresho bitangwa, Padiri Mudacyahwa yavuze ko hahuguwe abakorerabushake muri buri paruwasi bazakomeza guherekeza aba bagenerwabikorwa.Yanatanze ubutumwa asaba aba bakobwa guhinduka, bakagarukira Imana, ndetse bakabatirisha abana babo.

Ati “Turabasaba guhinduka kuko uruhare runini bararufite, bareke kwifuza ibintu, kwiyandarika, kandi birinde ingeso y’ubusambanyi imaze gufata indi ntera. Nkuko duhora tubigarukaho kandi, dukeneye ko aba bana bagarukira Imana bakabatirisha abana babo kugira ngo bakomeze kwisanga mu muryango w’Imana.”

Umuyobozi w’Akarere ka Rulindo wungirije ushinzwe imibereho myiza y’abaturage muri Rulindo Theophile Mutiganda yashimiye Kiliziya uruhare ikomeza kugira mu gufasha abanyantege nke. Yasabye abanyeshuri bahawe ibikoresho kuzabikoresha neza kandi bakabikoresha icyo byagenewe.

Uyu mushinga wari ufite ingengo y’imari ya Miliyoni 90 mu gihe cy’imyaka ibiri. Biteganyijwe uzasozwa muri Mata 2024.