Guhuza integanyanyigisho isanzwe n'Iteganywa na RwandaEquip byagaragajwe nk'ibikibangamiye Isomo ry'Iyobokamana

Iyi nama yitabiriwe na Padiri Lambert Dusingizimana, Umunyamabanga mu biro bishinzwe uburezi mu Nama nkuru y’Abepiskopi, Sr. Geneviève Uwamariya, Umunyamabanga wa Komisiyo ya Kateshezi, abagize Komisiyo ya Katesheze, ndetse n’abashinzwe isomo ry’iyobokamana mu mashuri ku rwego rwa Diyosezi.

Muri iyi nama hagaragarijwemo uko imyigishirize y’isomo ry’Iyobokamana ihagaze.

Bimwe mu bibazo byagaragajwe ko bikibangamiye imyigire n’imyigishirizwe y’isomo ry’Iyobokamana birimo; Imfashanyigisho n'integanyanyigisho zitarakwirakwizwa mu mashuri, amahugurwa adahagije ku barimu bigisha iyobokama,iIngengo y'Imari ikiri nke mu bijyanye n'ikenurabushyo ry’amanyeshuri, ndetse no kudashyiraho abantu bahagije bo gukurikirana bihoraho uko isomo ry'Iyobokamana mu mashuri rihagaze.

Jean De Dieu Ngendahayo ushinzwe Iyobokamana mu mashuri n’ubwigishwa muri Diyosezi ya Butare yagaragaje ko nubwo imfashanyigisho zabagezeho ariko hakiri ikibazo cy’abarimu badafite amahugurwa ahagije ku buryo bwo kwigisha Iyobokamana.

Ngendahayo yakomeje avuga ko uburyo bushya bw’imyigire buri mu biri kubangamira imyigire y’Iyobokamana.

Yagize ati “Mu mashuri basigaye biga hifashishijwe telefoni ‘RwandaEQUIP’. Ikibazo dufite rero nuko mu masomo yoherezwa muri izo telefoni usanga nta somo ry’iyobokamana ririmo.”

Yakomeje asaba Abepiskopi Gatolika mu Rwanda kugaragariza abarimu n’abashinzwe amashuri ibikubiye mu masezerano Kiliziya ifitanye na Leta kugira ngo bajye babona uko bakurikirana ibijyanye n’imyigire n’imyigishirize y’isomo ry’Iyobokamana.

Ngendahayo kandi yaboneyeho gusaba abayobozi b’amashuri kujya basaba umwarimu wigisha isomo ry’Iyobokamana kuko abarimu bahari babyize dore ko muri Kaminuza Gatolika y’u Rwanda harimo ishami rya Kateshezi.

Aganira na Kinyamateka, Myr Filipo Rukamba, Umwepiskopi wa Diyosezi ya Butare ari nawe Perezida wa Komisiyo y’Abepiskopi ishinzwe Kateshezi yemeye ko koko isomo ry’Iyobokamana rifite ibibazo byinshi ariko bigomba gushakirwa ibisubizo.

Ati “Nibyo isomo ry’Iyobokamana riracyafite ibibazo byinshi. Ibibazo by’abarimu badahagije bo kwigisha Iyobokamana, hari aho babuze abandi ntabwo babizi, (…) isomo kandi riracyafite ibibazo bijyanye no kurishyira ku murongo, ibibazo byo kurihuza na imyigire mishya ya ‘RwandaEQUIP’ n’ibindi.”

Nubwo byagaragaye ko isomo ry’iyobokamana rifite ibibazo mu myigire n’imyigishirize, Myr Rukamba yavuze ko atari ibibazo bidashobora kubonerwa umuti.

Ati “Twihaye gahunda mu madiyosezi ko tugiye kugenzura uburyo isomo ryigwamo ku buryo umwaka utaha tuzagaruka tunonosora uko isomo ryakwigwa neza.”

Yakomeje avuga ko we n’abepiskopi bazaganira ku cyakorwa kugira ngo buri diyosezi ibone abarimu bagaragara.

Mu gukemura iki kibazo ariko yavuze ko hakenewe kuzaganira na Leta kuko ariyo ishyira abarimu mu kazi kandi ikaba ari nayo ibahemba.

Myr Rukamba yongeyeho ko kugeza ubu imfashanyigisho zihari kandi zihagije, ahubwo ko igikenewe ari ukuzikwirakwiza mu madiyosezi yose.

Myr Rukamba yasoje asaba asaba abashinzwe isomo ry’iyobokamana kwita ku mashuri yo muri diyosezi zabo ku buryo bugaragara.

Ati “Nibagende barebe ese isomo ry’iyobokamana ririgishwa? Ese hari abarimu baryigisha? Ese abo barimu niba bahari barahuguwe? Ese hose umwana afite uburyo bwo kumenya Iyobokamana n’icyamufasha mu kwemera?”

Abitabiriye inama, biyemeje ko bazongera guhura muri Mutarama 2024 kugira ngo bagaragaze ibyo basanze mu madiyosezi bityo habone gukorwa iteganyabikorwa.