HVP Gatagara yahimbaje isabukuru y'imyaka 63 inibuka ku nshuro ya 41 Padiri Fraipont wayishinze

Ni ibirori byateguwe n’abafurere b’urukundo (Frère de la Charité) ari nabo bakora ubutumwa mu kigo cya HVP Gatagara. Byitabiriwe n’umushumba wa Diyosezi ya Kabgayi Myr Smaragde MBONYINTEGE ugiye kujya mu kiruhuko cy’izabukuru waje no kubereka Myr Balthazar NTIVUGURUZWA umushumba mushya wa Diyosezi ya Kabgayi ugiye kumukorera mu ngata.

Ibirori byabanjirijwe n’Igitambo cya Misa cyatuwe n’abasenyeri bombi bari kumwe n’abapadiri ba paruwasi ya Kigoma na Ruhango. Myr Smaragde, mu nyigisho ye yagarutse ku rukundo n'impuhwe byarangaga Padiri Fraipont asaba abo yasize kumufatiraho urugero.

Ati “ utabona ububasha bw’Imana mu byo Fraipont yakoze kuri aka gasozi k’urukundo ka Gatagara yaba atabona. Abafite ubumuga baboneye ubuvuzi n’ubuzima muri iki kigo babifashijwemo na padiri Fraipont wagendaga hirya no hino abashakisha akabazana ngo abavure. Urukundo n’impuhwe bigomba kuranga abo yasize, bigakorwa ku buryo butandukanye burimo kwita ku bana bafite ubumuga mu buryo bugaragara, kubafasha mu mu buremangingo, kubafasha mu kunoza umutima wabo , kubafasha mu bwenge kugira ngo bazagire icyo bimarira, no mu iterambere rusanjye rikikije ibyo Fraipont yakoraga. Mu bikorwa byose yakoze hari harimo ikimenyetso cy’urukundo n’impuhwe,ni ubutwari. Ni umurimo mwiza yatangije kandi yawusigiye Kiliziya nitwe tugomba kuwukomeza.”

Mu gitambo cya Misa yo kuzirikana ibikorwa bya Padiri Fraipont hanatanzwe amasakaramentu ku bana bateguwe harimo, batisimu , ukararisitiya n'Ugukomezwa.

Umunyamabanga Wa Leta muri ministeri y’ubutegetsi bw’igihugu Madamu Ingabire Assoumpta wari umushyitsi mukuru muri uyu muhango yavuze ko ibikorwa by’ikigo cya HVP Gatagara byivugira dore ko iki kigo kiri ku isonga mu guha agaciro abafite ubumuga. Yasabye kandi abagifite imyumvire yo guheza abafite ubumuga kwisubiraho.

Ati “Turashimira Kiliziya uruhare rwayo mu gufasha Leta kwita ku bafite ubumuga. Iyo urebye ibikorwa bya Kiliziya n'uruhare rwayo mu gufasha no kurengera abafite ubumuga harimo n’iki kigo cya HVP Gatagara, ntiwabura gushima. Turasaba inzego z’ubuyobozi gukomeza gushyigikira gahunda yo gufasha abafite ubumuga kandi bakabishyira no mu mihigo yabo. Kuko nk’igihugu giha amahirwe abantu bose n’abafite ubumuga bashyiriweho politike yo kubafasha no kubarengera by’umwihariko ari nayo mpamvu dusaba abagifite imyumvire yo guha akato abantu bafite ubumuga kubireka bigacika burundu kuko n’abafite ubumuga barashoboye. Ababyeyi bumva ko kwita ku mwana ufite ubumuga, kumuha umwanya no kumutangira amafaranga y’ishuri ari uguta umwanya, si byo.”

Myr Balthazar Ntivuguruzwa watorewe kuyobora Diyosezi ya Kabgayi, yavuze ko kubona HVP Gatagara ari ukubona Imbuto y’urukundo yatewe mu Rwanda ku kagasozi k’urukundo ka Gatagara asaba buri wese kuyirinda .

Ati “ Padiri Joseph Fraipont Ndagijimana nta kindi yari atwaye mu mutima, kitari urukundo n’ubwitange, imbabazi n’impuhwe yavomaga mu mutima wa Yezu Kristu we rukundo, mpuhwe na Bwitange. Ni byo byatumye tubona ibi bikorwa bigaragaza izo mpuhwe, turamushimira. Turi gusarura imbuto zatewe na Padiri Fraipont mu myaka 63 ishize, turasabwa gukomeza gusigasira ako kabuto k’urukundo n’impuhwe ntikazarumbe.”

Mu buhamya bw’abarerewe mu kigo cya HVP Gatagara bavuga ko kuvuga padiri Fraipont ari nko kuvuga amateka y’Imana.

KUBWIMANA Madeleine wageze muri HVP Gatagara ari umwana muto ufite imyaka ine . Ati” Abafite ubumuga ntituzibagirwa padiri Fraipont waduhagurukije tukabasha kugenda. Padiri Fraipont yagaragaje ko abafite ubumuga dufite ubwenge kandi tubasha no gukora iyo duhawe ubuvuzi ,uburezi n’umwanya wo kugaragaza ibyo dukora. Ubu ndi rwiyemezamirimo nanjye ntanga akazi kajyanye no kwambika abantu binyuze mu buboshyi bw’imipira.”

Mukakamanzi Marthe wageze muri HVP Gatagara 1970 avuye I Butare , avuga ko ari mwene Fraipont Ati” Turi bene Fraipont kuko ari we waduhaye gukomeza ubuzima ubu tukaba turi abantu bafite agaciro mu gihugu. Ikintu nasanze muri HVP Gatagara ni urukundo rw’indengakamere. Twaje kureba padiri wacu yatugiriye neza, twari abantu batitabwaho, twagendaga twicaye, dukambakamba none ubu tugendesha amaguru yacu. Baduhaye insimburangingo, baduha uburezi, baduha ubuzima n’uburere kandi byose nta kiguzi ababyeyi bacu batanze. Ubu iyo ntagira padiri Fraipont nanjye mba ndi kumuhanda nsabiriza ariko uyu munsi ndi umukozi nkora muri laboratoire,nanjye mfasha abafite ubumuga kugira ngo bagire ubuzima bwiza. Turashimira leta kuko yemeye ko mutuel de sante ikorana n’iki kigo cya HVP Gatagara kugira ngo tubashe kubona insimburangingo, turashimira kandi ko hanashyizweho inama y’igihugu y’abafite ubumuga NCPD kugira ngo ikomeze kureba abafite ubumuga no kwiga ku bibazo byabo. “

BARAWIGIRIRA Elyse nawe yabaye mu kigo cya HVP Gatagara avuye mu karere ka Gakenke 2004 ubwo yari amaze kumugara ageze mu mwaka wa kane w’amashuri abanza. Yavuze ko padiri Fraipont yahinduye ubuzima bw’abari inyangwa bakaba inkundwa. Ati “Padiri Fraipont ni umubyeyi w’abanzwe n’abababyaye , batubwiraga ibyaranze ubuzima bwe, mbona ko ari umubyeyi w’impuhwe, umubyeyi w’abari babuze ababyeyi. Hari umubyeyi wabyaraga umwana ufite ubumuga akavugaga ko ishyano riguye mu muryango ko ari umuruho babyaye, bagahitamo kubahisha ngo batababona. Padiri Fraipont yagendaga hirya no hino ashakisha abana nk’abo bari banzwe n’ababyeyi babo. Dore ko hari nabo bazanaga bakabata mu kigo bakigendera ntibazagaruke kubareba. Twiboneye umubyeyi Padiri Fraipont , ubuzima bw’umuntu ufite ubumuga burazamuka kandi butera imbere . “

Ikigo cya HVP Gatagara cyashinzwe mu 1960 gishingwa na Padiri Joseph Fraipont NDAGIJIMANA waje mu Rwanda aturutse mu Bubiligi. Imyaka 63 irashize HVP Gatagara iri ku isonga mu guha agaciro abantu bafite ubumuga. Itanga ubuvuzi n’uburezi budaheza n’ubwihariye ku bafite ubumuga . Kuri ubu HVP Gatagara ifite ibigo 9 mu gihugu mu turere twa Nyanza, Huye ,Rwamagana , Gasabo na Kicukiro. Buri mwaka tariki ya 26 Gicurasi hazirikanwa ibikorwa bya Padiri Fraipont washinze iki kigo akaba yaratabarutse tariki ya 26/5/1982.Ibirori byaranzwe no kongera guhura kw’abarerewe mu kigo cya HVP Gagatagara, gushyira indabo ku mva ye no gusabana, abana banerekanye impano zinyuranye harimo n’iyo kuririmba umwihariko w’iki kigo.