INES – RUHENGERI yahawe Umuyobozi mushya
Musenyeri Visenti Harolimana Umwepiskopi wa Ruhengeri,akaba n’umuyobozi w’ikirenga w’iyi Kaminuza yatangaje ku mugaragaro ko Padiri Jean Bosco BARIBESHYA ari we muyobozi mushya wa INES-Ruhengeri, asimbura Padiri Fabiyani HAGENIMANA ugiye gukomereza ubutumwa muri Foyer de Charite Remera-Ruhondo, Paruwasi ya Rwaza.
Umuhango w’ihererekanya bubasha hagati y’umuyobozi mushya n’uwahoze ayobora iyi kaminuza mu gihe cy’imyaka 8 ishize wabaye ku wa gatatu tariki 27 Nyakanga 2022 i Musanze, ku cyicaro cy’iyi Kaminuza Gatolika.
Myr Visenti yashimiye Padiri Fabiyani Hagenimana uruhare yagize mu iterambere ry’iyi Kaminuza kuva igitangira kugeza uyu munsi,dore ko yari amaze imyaka igera kuri 14 ayikoramo. Yifurije kandi ikaze umuyobozi mushya w’iyi Kaminuza Padiri Jean Bosco Baribeshya, amubwira ko bamwakiranye ibyishimo mu mirimo mishya yo gukomeza guteza imbere iyi kaminuza, igakomeza kuza ku isonga mu guteza imbere amasomo y;ubumenyingiro, kandi bamutezeho umusaruro ushimishije.
Padiri Dr. Jean Bosco BARIBESHYA Umuyobozi mushya wa INES Ruhengeri ni umupadiri wa Diyosezi ya Ruhengeri uvuka muri Paruwasi ya Mwange, amaze imyaka 20 ahawe isakaramentu ry’Ubusaseridoti, afite impamyabumenyi ihanitse (Doctorat) yakuye mu Butaliyani, akaba kandi yarakoreye ubutumwa mu Budage mu myaka irindwi, imyaka ine muri Amerika, akaba ahawe inshingano zo kuyobora INES-Ruhengeri nyuma y’uko yari Umuyobozi wa Seminari nto ya Nkumba.
Ibitekerezo (0)
- Nta gitekerezo kirahaba. Ba uwa mbere utanga igitekerezo.
