Ku nshuro ya mbere ICK yesheje umuhigo wo guha impamyabumenyi abanyeshuri basaga 1000.

Ni ibirori byabereye muri sitade y’akarere ka Muhanga, byitabiriwe n’abayobozi batandukanye barimo umuyobozi w’ikirenga wa ICK, Myr Balthazar Ntivuguruzwa umwepisikopi wa Diyosezi ya Kabgayi, ari kumwe na Myr Simargde Mbonyintege umwepisikopi wa Diyosezi ya Kabgayi uri mu kiruhuko cy’izabukuru. Hari kandi umuyobozi waturutse muri ambasade ya Congo Brazaville waje gushyigikira abanyeshuri baturutse muri iki gihugu baje kwiga muri ICK. Umuyoboziwungirije w’akarere ka Muhanga ushinzwe iterambere ry’ubukungu n’abayobozi ba za Kaminuza zitandukanye zifitanye umubano mwiza na ICK, Harimo , UTAB Byumba , INES Ruhengeri, ILPD, UTB n’izindi, hari kandi n’abaterankunga batandukanye ba ICK ,ama hotel n’ama bank akorera mu mujyi wa Muhanga.

Myr Balthazar Ntivuguruzwa umwepisikopi wa Diyosezi ya Kabgayi akaba n’umuyobozi w’ikirenga wa ICK yavuze ko bishimiye intambwe ICK imaze gutera mu myaka 22 imaze ishinzwe. Yavuze bimwe mu byo bishimira ku mwanya wa mbere ari umubare w’abanyeshuri bagana ICK ugenda wiyongera buri mwaka n’amashami mashya agenda yiyonger.Ati “ Turishimira umubare w’abanyeshuri ugenda wiyongera. Mu bihe byashize umubare ntiwajyaga urenga 1200, cg 1300 ariko ubu umubare umaze gusaga ibihumbi 4. Turishimira umubare w’amashami ugenda wiyongera harimo n’ishami rishya ry’ubuzima ririmo udushami tubiri, ubuforomo n’ububyaza. Uyu munsi twishimiye umubare w’abagera ku 1137 bahawe impamyabumenyi ari nabwo bwa mbere mu mateka ya ICK habonetse umubare w’abarangije bangana batya mu gihe kimwe, ni ibintu byo kwishimira.

Yashimiye abanyeshuri ishyaka n’umuhate bagaragaje mu rugendo rutari rworoshye. Yabifurije ishya n’ihirwe mu rugendo batangiye.Yifuriza umunsi mwiza abarimu bigisha muri ICK ndetse n’abahawe impamyabumenyi kuko bafite uruhare rukomeye mu iterambere ry’igihugu cyacu.

Myr akomeza avuga ko mu myaka 3 igiye kuza ICK izaba yizihiza Yubile y’imyaka 25. Asaba abayobozi ba ICK gutangira gutekereza igikorwa cy’izaherekeza iyi Yubile bigategurwa kare kugira ngo kizabe ari ikirango cya Yubile mu ntambwe ICK igenda itera

Myr yashimiye ministeri y’uburezi mu rwego rushinzwe kaminuza n’amashuri makuru ndetse na ministeri y’ubuzima uko yashyigikiye ishami ry’ubuzima ICK iheruka gufungura kandi ikaritera inkunga ibafasha kunoza program no kubonera uburyo n’ibikoresho abanyeshuri barenga 90% by’abiga mu ishami ry’ubuvuzi.

Umuyobozi w’akarere ka Muhanga wungirije ushinzwe ubukungu n’iterambere Bizimana Eric yavuze ko nk’akarere batewe ishema no kuba bafite ishuri ryiza nka ICK .Agira ati ” Iyo urebye mu nzego zitandukanye, zaba iz’ubuyobozi, abakozi ba leta,mu miryango itari iya leta no mu nzego z’abikorera , hose uhasanga abize muri Ick kandi batanga service nziza. Ibi tubishimira cyane ubuyobozi bwa Diyosezi ku bw’umuhate bashyiramo kugira ngo abantu be kwiga amasomo gusa ahubwo bige n’indangagaciro zigomba kuranga buri muntu. Cyane cyane ko igihugu cyacu cyubakira ku bunyangamugayo kandi bikaba ubudasa igihugu cyacu kihariye mu kubaka umuryango nyarwanda. Iyo urebye impande zose ubona ko ibikorwa bikorwa na ICK byubakirwaho kugira ngo twubake ejo hazaza. ICK yabaye isoko y’ubumenyi burambye ku bana b’u Rwanda ndetse n’abanyamahanga muri iyi myaka 22 ishize , bikaba ari kimwe muri bwa budasa bugaragara muri ICK.

Vice Mayor yabwiye abanyeshuri barangije ko umuhate n’imbaraga n’ubwitange bagaragaje mu rugendo ari byo bibagira indashyikirwa. Ati” urugendo rwo kwiga ntabwo ari ibintu biza gutyo gusa. Nimuze dufatanye kubaka igihugu, Ubwenge n’ubumenyi mwahawe ntimukajye mubifungirana ahubwo mubikoreshe mube umusemburo w’impinduka mu iterambere ry’igihugu.”

Yabasabye kuzarangwa n’ubwitonzi n’amakenga kandi bagahora biga kuko ari byo bizabafasha kugera kure kandi heza. Ati” Igihe ubunyangamugayo bubuze, ntabwo twafatanya kubaka igihugu, ariko mu gihe twubakiye ku bunyangamugayo, igihugu kizagira ahazaza heza h’igihu ndetse n’isi.”

Mu mpanuro bahawe n’ umuyobozi wa ICK Padiri Prof. Dushimimana Fidele yababwiye ko impamyabumenyi bahawe ari urufunguzo ruzabafasha kwinjira ku isoko ry’umurimo. Yagize ati” Igihugu gitegereje amaboko yanyu mu kugifasha kurushaho gutera imbere. Turizera ko impamba mukuye muri ICK izabafasha kwiteza imbere no guteza imbere igihugu cyacu. Ubumenyi ICK yabahaye, umutimanama wanyu n’uko yabatoje gutega amatwi, hamwe n’indangagaciro mwahavomye zo guharanira ukuri ubutabera n’ubufatanye, muzabigire ishingiro ry’ubuzima mugiyemo. Ubumenyi tubusanga hose kandi benshi barabufite, ariko umutimanama , ukuri, ubutabera n’ubufatanye si benshi tubisangana. Mwebwe bizabarange aho muzajya hose, muzabikoreshe mu mwuga muzakora uwo ari wo wose. Umutimanama, ukuri,ubutabera n’ubufatanye mu mirimo yose na hose, nibwo bwo muzahirwa kandi mukabera abandi urumuri. “

Muhangi Duncan umwe mu banyeshuri bahawe igihembo cy’uko bahize abandi, akaba yaravuye mu gihugu cya Uganda aje kwiga muri ICK. Avuga ko yamenye ICK kubera inshuti ze z’abanyarwanda kuko yumvaga akunze kwiga ururimi rw’ikinyarwanda. Arangije mu ishami ry’inozabubanyi (Public Relations) akaba avuga ko yabihisemo kuko abona u Rwanda ari igihugu gikura vuba vuba mu Africa no East Africa. Agira ati“Ibintu nize , bijyanye no kureba ahari amahirwe menshi , naje mu Rwanda kuhiga kugira ngo ndebe ko nabona amahirwe (Oportunity) mu gihugu kiri gukura vuba. Avuga ko nyuma yo kuba indashyikirwa mu bijyanye n’inozabubanyi (PRO) yifuza gukomeza gukorera akazi mu Rwanda n’ubwo yumva yiteguye no kuba yagakorera no mu bindi bihugu ariko ku mwanya wa mbere ni U Rwanda.

Madame Uwimbabazi Claudine umwe mu bangije mu ishami ry’uburezi mu gashami k’icyongereza n’ikinyarwanda yabwiye Kinyamateka ko ubumenyo bavomye muri Ick butanga umusaruro ku isoko ry’umurimo. Bityo bakaba bifuza ko ICK yakwihutisha gushyiraho icyiciro cya 3 cya Kaminuza kandi bakaba biteguye kuhagaruka kuko uretse ubumenyi bahakuye, bahakuye n’indangagaciro zibubaka kandi zikubaka n’igihugu.

Ishimwe Honole umwe mu barangije mu ishami ry’itangamakuru akaba n’umwe mu bari bamaze igihe bakora umwuga w’itangazamakuru ariko nyamara atarabashije kurangiza neza amasomo ye. Nyuma y’imyaka 16 akaba yarafashe icyemezo cyo kugaruka akarangiza amasomo. Avuga ko umwuga w’itangazamakuru kuwukora warawize bifite icyo byongera mu ndangagaciro nk’umunyamakuru. Avuga ko icyatumye ashimangira icyemezo cyo kugaruka kurangiza amasomo ye muri ICK ari ubudasa bwayo mu gutegura abanyamakuru kuko iyo urebye abanyamakuru benshi mu gihugu bakora uyu mwuga usanga abenshi baba barize muri ICK.Ati” Kuban di umunyamakuru usanzwwe ufasha na bagenzi banjye mu gutunganya ibyo bakora, kuba mbiboneye impamyabumenyi bigiye gutuma ndushaho gukora noza umwuga. Kandi nanabera urugero bagenzi banjye baba abo dufata batize itangazamakuru, iyo uri kumusobanurira azi neza ko wabyize, bimuha ikizere cy’uko hari icyo azagukuraho kimwubaka muri bwa bunyamwuga.”

Agaruka ku cyatumye atajya kwiga mu zindi kaminuza, Honore avuga ko ICK ifite izina ryiza mu kwigisha itangazamakuru ari cyo gituma n’abahavuye bongera kuhagaruka kandi n’abandi benshi bakaza kuhiga kuko ubumeny bahavoma butanga umusaruro ku isoko ry’umurimo. Asaba ko ICK yabazanira ikiciro cya Master’s kuko byafasha abanyamakuru benshi kandi nta gushiidikanya ko baza ari benshi bashaka kwiga kuko byagabanya urugendo rw’abajya kuyiga hanze y’u Rwanda. Asaba ko bishobotse ICK igafungura amashami hirya no hino mu zindi ntara nabyo byafasha abava kure kuko benshi bamenye ICK kandi bakaba bashaka kuza kuyivomamo ubumenyi.

Ishuri rikuru gatolika rya Kabgayi ICK ryashinzwe mu mwaka wa 2002, rimaze kugira Program zitandukanye zigera kuri 13 mu mashami atandukanye . Ryiteguye no gutangiza program nshya za Science mu ishami ry’uburezi. Ame mumashami yigishwa muri ICK harimo : Itangazamakuru , inozabubanyi, iterambere ry’imigi n’icyaro, kubungabunga ibidukikije, imbonezamubano, imicungire y’imari , uburezi mu by’indimi, uburezi mu by’ubumenyi bw’isi, na Poste graduad Diploma in education.