Leta y’u Rwanda yongereye umushahara w'abarimu bigisha mu mashuri abanza n’ayisumbuye

Ibi Minisitiri w’ Intebe Dr. Edouard Ngirente yabitangaje ku gicamunsi cyo kuri uyu wa mbere tariki 1 Kanama 2022, mu kiganiro kigaruka ku bikorwa bya Guverinoma bijyanye n’ibimaze kugerwaho mu rwego rw’uburezi bw’ibanze (Amashuri abanza n’ayisumbuye) muri gahunda ya NST 1 (ijyanye n’icyerekezo igihugu gifite).

Akomoza ku izamurwa ry’imishahara y’abarimu bigisha mu mashuri abanza n’ayisumbuye, Minisitiri w’Intebe Dr.Edouard Ngirente yagize ati “Mwarimu wo mu mashuri abanza yongerewe agera kuri 88% by’umushahara ahembwa, bikazatangirana n’ukwezi kwa munani; abarimu bo mu mashuri yisumbuye bafite A0 na A1 bo bazongererwa 40% by’umushahara umwalimu wo kuri urwo rwego atangiriraho.”Akavuga ko kongera umushahara wa mwarimu bijyanye no kumwongerera ubushobozibwo kugirango abe yahabwa inguzanyo ifatika mu Mwalimu SACCO.

Minisitiri w’Intebe Dr.Edouard Ngirente yavuze ko hari n’andi mafaranga Leta y’u Rwanda yashyize muri Koperative Umwalimu SACCO kugira ngo azorohereze abarimu kubona inguzanyo zitubutse zibafasha kwiteza imbere. Minisitiri Dr.Edourd Ngirente yagize ati“Kongera umushahara wa mwarimu twabijyanishije no kongerera ubushobozi Koperative Umwalimu SACCO,[…] muri iyi ngengo y’Imari 2022/2023 Leta yashyizemo amafaranga agera muri Miliyari 5 kugira ngo abarimu bashobore kuguza.”Akavuga ko ibi ari muri bimwe mubyo Guverinoma y’u Rwanda ikomeje gukora hagamijwe guteza imbere Uburezi mu Rwanda.

Mu Rwanda habarurwa abarimu 68.207 bafite icyiciro cya A2 bigisha mu mashuri abanza, abarimu 12.214 bafite icyiciro cya A1 bigisha mu mashuri yisumbuye, n'abarimu 17.547 bafite icyiciro cya A0 bigisha mu mashuri yisumbuye.