Seminari nkuru ya Kabgayi Philosophicum yatangiye umwaka w’amashuri ufite intego yo kuba mu isi utari uw’isi.

Ibirori byo gutangiza umwaka w’amashuri mu iseminari nkuru ya Kabgayi Philosophicum byahuriranye no guhimbaza umunsi mukuru w’abatagatifu bose ku wa gatandatau tariki ya 01 Ugushyingo 2025. Myr Balthazar yavuze ko ari ingabire idasanzwe kuba abaseminari batangiye umwaka bisunga ababaye abatagatifu bari mu ihirwe ry’ijuru. Yagize ati’ Ubutagatifu ni umuhamagaro w’ibanze Imana itugezaho. Mbere y’uko Imana ibahamagarira kuba abasaseredoti ibahamagarira kuba abatagatifu mbere na mbere. Ubutagatifu si umwihariko kandi si n’umurage w’ibyiciro bimwe na bimwe muri Kiliziya, ahubwo ni inzira buri mu kristu ahamagariwe, bikaba akarusho ku basaseredoti no kubitegura kuba bo.”

Agaruka ku ijambo rizaherekeza uyu mwaka w’masomo mu Seminari nkuru ya Kabgayi Philosophicum 2025-2026 igira iti “Kuba mu isi utari uw’isi (ETRE DANS LE MONDE SANS ETRE DU MONDE” nk’uko tubisanga mu ivanjiri ya Yohani 17-14-16)

Myr Balthazar yagize ati “Baseminari ni mwemere kurerwa kandi mwemere Roho mutagatifu abakoreremo, nimwemera Imana igende ibabumbabumba, ibakunde namwe muyikunde kandi ntimuzigere na rimwe mwibagirwa intego yabazanye hano kandi iyo ntego igende ibaharanya buri munsi. Kuba abasaseredoti bafite umutima nk’uwa Kristu,kuba abasaseredoti bagamije iteka ikuzo ry’Imana n’umukiro wa muntu.”

Yababwiye ko bagomba kuba maso muri iyi si ikanuye amaso, bakirinda gutwarwa n’isuri y’ibije byose kuko guharanira ubutagatifu bisaba kumenya kwitaza imivumba y’isi isambira ibyo isanze. Ati” Mube maso mumenye kwiramira, kuko umwanzi wacu sekibi ahora azerera nk’intare itontoma ishaka uwo yaconcomera.

Myr Balthazar asaba abaseminari kwakira urukundo rw’Imana batizigama mu bwingenge no mu bwitange, nk’uko ababaye abatagatifu batubanjirije babaikoze. Ati “Mu iseminari ni ahantu hatangirwa uburere n’uburezi byuzuye ni mu ishuri ry’ubutagatifu. Si ahantu abantu baza bagamije gushakashaka ubumenyi busanzwe, ahubwo ni ahantu baza bagamije guhinduka maze Imana ikabasenderezamo ubuvunyi bwayo. Ni aho Imana igenda ibumba umutima wa buri wese kugira ngo umutima uzabe umutima w’umushumba mwiza.

Aha ni naho yahereye yibutsa abaseminari gukura mu mfuruka enye z’uburere bahabwa ari zo:

Gukura mu mibereho no mu mibanire (La Formation Humaine) kugira ngo bihatire kugira ubumuntu bwuzuye, bubafasha kubana neza n’abandi, birinda akajagari mu mibereho no mu mikorere.

Gukura mu mubano wabo n’Imana (La formation Spirtuel) kugira ngo ubuzima bwabo bushinge imizi mu Mana binyuze mu isengesho ritaretsa mu kumenya gutuza, mu gutega amatwi ijambo ryayo ndetse no kumvira ugushaka kwayo.

Gukura mu kwiyungura ubumenyi (La Formatio Intellectuel) kugira ngo bashobore gusobanukirwa n’ibiriho, ibidukikije n’ibitekerezo, ndetse no kugira ngo bashobore kugenda kuri ya mababa abiri Mutagatufu yohani Pawulo wa II ababwira, mu rwego rwo kurushaho kurangamira ukuri nyako ndetse no kugusobanurira abandi neza.

Hakaba no Gukura mu kwitoza kuzaba abashumba b’imbaga y’Imana no kwitoza ubutumwa bazakora (Formation Pastoral) kugira ngo barusheho gukunda kiliziya umubyeyi wacu twese no kugira ngo bazayikorere kandi bitoza kuzitangira umuryango w’Imana bazatumwaho.

Yabasabye kandi kuzirikana amasomo biga igihe cyose, basenga, bazirikana gahunda zose uko seminari izibashyikiriza , umubano wabo n’abavandimwe babo , kuko ari byo tafari Imana ikoresha kugira ngo igende yubaka umuhamagaro ibagezaho. Yabasabye ko nta na kimwe cyazabacika mu byo bahamagarirwa byose.

Myr Balthazar yavuze ko umunsi mukuru w’abatagatifu bose, tugomba kuwuzirikana nk’ikizere cy’ubukristu bwacu. Ati” Muguhimbaza umunsi mukuru w’abatagatifu bose, tubona ko inzira y’ubutagatifu ari inzira ishoboka kandi itanga ibyishimo by’ukuri. Ubutagatifu ni isoko y’ibyishimo kuko ari indunduro y’ingabire Imana yashyize muri buri wese muri twe. Kuba intungane ni isoko y’ibyishimo kuko Imana ubwayo iba ituye muri twe mu mfuruka zose.

Myr Balthazar yasabye abaseminari ko buri wese azahitamo umutagatifu we w’umwaka kugira ngo azamubere ishuri yigiraho ubuyoboke, ishyaka n’ubutwari byamuranze kandi akanamuherekeze mur= rugendo rwe. Ati” Buri wese asanzwe agira umutagatifu ahimbaza, yitiriwe, ariko buri wese agire umutagatifu w’umwaka.”

Yashimangiye ko muri iyi si irangwa no gushidikanya, ibundikiwe n’umwijima w’ubuhakanyi, duhamagriwe kuba ibimenyetso bifatika by’ivanjiri, kuba itara rimurika rigatanga umucyo mu mwijima w’ikibi. Ati” Baseminari duhamagariwe kuba abahamya b’amizero dukesha Kristu udutora kandi udutuma. Abatagatifu duhimbaza batubere abajyana, inshuti, abasangirangendo kuko ari bakuru bacu badufashe akaboko mu rugendo turimo rugana Imana.

Ndahimana Romeo umufaratiri mu iseminari nkuru ya Kabgayi yavuze ko bishimiye uyu munsi wo gutangiza umwaka w’amashuri mu iseminari kuko wahuriranye n’umunsi mukuru w’abatagatifu bose. Ati” Ni umunsi dufata nk’isoko y’itangiriro rishya, utwibutsa ko guhamagarwa n’Imana bidahagarara. Buri mwaka ni amahirwe yo kongera gusubiza Yego mukuri, ni igihe cyo gusubiza amaso inyuma tugashimira Imana ari nako duharanira gukura mu bwenge n’ubumuntu ndetse akaba ari nacyo duharanira.

Faratiri Romeo yabwiye abaseminari bagenzi kwibuka ko guhamagarwa ari urugendo kandi bagahora iteka baharanira ubutungane. Ati” Abafaratiri tugomba gukunda isengesho, gukora neza ibyo dushinzwe kugira umutima w’ubwitonzi no kwirinda icyadusitaza muri uru rugendo ahubwo turangamiye Yezu Kristu amizero yacu.

Agaruka ku ntego y’uyu mwaka izagenderwaho umwepisikopi yatanze, Faratiri Romeo yavuze ko Ukurikije igihe turimo kuri ubu bibasaba kwibuka ko turi mu isi ariko tugomba kuyibamo tutari ab’isi. Agira ati” Iri ni jambo ryiza kandi rizatuyobora rikadufasha kubaho mu buzima bw’umuseminari tuzirikana ko turi itara rimurikira abandi mu iyi isi yihuta cyane mu ikoranabuhanga.

Patience Niyibigira umufaratiri mu iseminari nkuru ya Kabgayi Philosophicum mu mwaka wa 3 yabwiye Kinyamateka ko bishimiye gutangira undi mwaka w’amasomo bari kumwe n’umwepisikopi wa Diyosezi ya Kabgayi. Yavuze ko impanuro bahawe na Myr Balthazar biteguye kuzishyira mu bikorwa zose kandi bazirikana intego yabo n’icyo bahisemo kurusha ibindi. Yagize ati” Isengesho, kwiga no kumenya kubana n’abandi ni byo bikwiye kuranga umuseminari kugira ngo azashobore kuba umupadiri mwiza unyuze kristu na Kiliziya ye. Ni ubutumwa bwiza twakiriye kandi twizeye ko buzatugeza ku byo twifuza. Intego y’uyu mwaka turayishimiye kuko ni ijambo ritwigisha byinshi, ritubwira ko tugomba kuba intumwa za Kristu kandi zidahinduka, dutumwe kujya kwamamaza Kristu uko turi tudahinduka. Ukubaho kwacu kugomba gutuma ubukristu bwacu bigira ishingiro.

Uyu mwaka Seminari nkuru ya Kabgayi Philosophicum ifite abaseminari bagera kuri 274 bose hamwe harimo n’abiga bataha muri kominote zitandukanye nk’abalazariste, aba Rogationiste, Sacres –Coeur n’abaselesiane ba mutagatifu Don Bosco, harimo n’abava mu bihugu byo hanze nk’u Burundi,Uganda, RDC, Tanzanie, Nigeria na Gabon. Bafite kandi abarimu 8 bavuga ko baniyongereye ugereranyije no mu myaka yashize.