Umunsi mukuru w'Ubutatu Butagatifu usigiye Amashuri yeguriwe Ubutatu Butagatifu yo mu Ruhango inyubako nshya

Yagize ati "Buri mwaka twihaye intego yo gushyiraho inyubako nshya. Kuri Sainte Trinite y'umwaka ushize twari dufite intego yo kubaka amacumbi, ubwiherero n'ibyumba by'amashuri bishya. Byose byamaze kuzura, bikaba byaratangiye gukoreshwa mu guhangana n'ikibazo cy'ubucucike, kugira ngo abana bige neza bisanzuye."

Dr Usengumuremyi Jean Marie Vianney, Uyobora Inama y'Ubutegetsi y'Amashuri yeguriwe Ubutatu Butagatifu mu Ruhango na Nyanza yabwiye Kinyamateka ko bishimira uko bakomeje kwesa umuhingo wo kongera ibikorwa remezo by'aya mashuri mu rwego rwo gufasha abayarererwamo kwiga neza.

Ibirori by'umunsi mukuru w'amashuri yeguriwe Ubutatu Butagatifu ariyo: Ecole Secondaire Sainte Trinité Ruhango, Ecole Technique Sainte Trinité Ruhango TSS, Sainte Trinité Nyanza TSS,Ingenzi Trinity School na Morning Trinity Shool Ruyenzi, byabereye mu ishuri rya Sainte Trinité Ruhango Tss bibimburirwa n'Igitambo cya Misa cyayobowe na Padiri Eugène Niyonzima Umukuru w'Abapalotini mu Rwanda, RD Kongo n'U Bubiligi, wari kumwe n'abandi bapadiri bakorera ubutumwa muri paruwasi Ruhango.

Dr Jean Marie Vianney akomeza avuga ko, bafite n'indi mishinga, irimo umushinga wo gutangiza Sosiyete izafasha urubyiruko rurangije mu mashuri yitiriwe Ubutatu Butagatifu kwihangira imirimo no gutanga akazi aho kugasaba.

Yagize ati "Twishimiye ko uburezi bwo muri Sainte Trinite bugenda buhinduka bujya aheza. Twishimiye ibyumba by'amashuri bishya byamuritswe. Bimwe byatangiye kwifashishwa ibindi bikazifashishwa umwaka w'amashuri utaha. Biratanga ikizere ko aya mashuri ari kugana aheza."

Nyabyenda Narcisse umwe mu babyeyi barerera mu bigo byitiriwe Ubutatu Butagatifu mu Ruhango, yavuze ko bishimiye ko ikibazo cy'ubucucike mu byumba by'amashuri kiri kugenda kibonerwa igisubizo kirambye. Avuga ko ari ingenzi cyane kuri aya mashuri akomeje kugirirwa ikizere akanahabwa n'abanyeshuri baba batsindiye imyanya mu mashuri ya Leta.

Bamwe mu bana biga muri aya mashuri yeguriwe Ubutatu Butagatifu, bavuga ko bishimiye iterambere amashuri yabo akomeje kugeraho yongera ibikorwa remezo bibafasha kwiga neza.

Mugabo John umunyeshuri muri Sainte Trinite ya Nyanza wiga ibijyanye n'amahoteri n'ubukerarugendo yabwiye Kinyamateka ko mu myaka yashize bari bafite ikibazo cy'amacumbi, ubu bakaba bishimira ko kigenda gikemuka.

Yagize ati "Umwaka ushize ubucucike bwari bwinshi. Mu gihe cy'izuba amwe mu mashuri yabaga afite abana bari hejuru ya 70 byabaga ari ikibazo. Twishimiye ko uyu mwaka wa 2024, ibyumba by'amashuri bimwe byamaze kuzura ubu tukaba twiga neza nta kibazo cy'ubucucike."

Ishimwe Chantal wiga mu mwaka wa 5 MEG muri Ecole Sainte Trinite de Ruhango, yatangarije Kinyamateka ko bishimiye ko ikigo cyabo gikomeje kurushaho kuba kiza. Ati "Baduhaye amashuri mashya, baduha n'Inzu mberabyombi aho twidagadurira."

Amashuri yeguriwe Ubutatu Butagatifu amaze kuba atanu, ariyo: Ecole Secondaire Sainte Trinité de Ruhango yashinzwe muri 2007, Ecole Technique Sainte Trinité de Ruhango yashinzwe mu mwaka wa 2012, Ecole Sainte Trinité Nyanza TSS yashinzwe muri 2015, Ingenzi Trinity school yashinzwe muri 2020 yombi aba mu karere ka Nyanza ahitwa mu Butansinda na Morning Trinity School yashinzwe mu mwaka wa 2023 ku Ruyenzi mu karere ka Kamonyi ifite amashuri abanza n'ay'inshuke.