Urubyiruko rusaga 1000 rwa Diyosezi ya Butare ruteraniye muri Forumu i Kiruhura

Iyi Forumu ibaye ku nshuro ya 8, ifite Insanganyamatsiko igira iti "Muri iyo minsi Marie yarahagurutse agenda yihuta." Akaba ari insanganyamatsiko urubyiruko rwazirikanyeho uyu mwaka rwitoza gufatira urugero kuri Bikira Mariya.

Padiri Alex Ndagijimana, Omoniye w'urubyiruko ku rwego rw'igihugu, ni we wayoboye Igitambo cy'Ukaristiya gifungura ku mugaragaro iri huriro. Mu butumwa bwe akaba yashishikarije urubyiruko gukunda Ijambo ry'Imana no guhabwa Penetensiya.

Padiri Innocent Bizimana, ushinzwe urubyiruko muri Diyosezi ya Butare, yavuze ko Forumu ifasha urubyiruko kugaruka ku isoko bakongera kwibuka ko Imana yabaremye, bagomba guhora bayirangamiye.

Bimwe mu biteganyijwe kuzakorwa muri iyi forumu harimo: Kurushaho gusaba n'Imana na bagenzi babo, gutozwa indangagaciro za gikristu, gushishikarizwa iterambere binyuze mu matsinda, kubakangurira ibikorwa by'urukundo aho bazasura abarwayi ku kigo nderabuzima cya Rubona, bakazanakora umuganda wo kubakira abatishoboye mu murenge wa Rusatira.

Ati "Iyo urubyiruko utarubaye hafi rufata ibyo rubonye. Forumu ikaba ari kimwe mubibafasha, kuko bigishwa kureka ibiyobyabwenge n'ibindi bibi."

Bamwe mu rubyiruko rwaganiriye na Kinyamateka rwavuze ko muri izi forumu bungukiramo byinshi nko kubona umwanya uhagije wo gusenga, guhabwa penetensiya ndetse bakanazungukiramo inshuti nshya kuko bakirwa mu miryango inyuranye.

Joseline MURAGIJIMANA, umujene wo muri Paruwasi ya Kiruhura yagize ati "Inyungu zo kuza muri forumu ni nyinshi. Forumu ituma umuntu ahuguka akabona abandi, akigishwa, akava mu kigare yari asanzwe arimo, akumva ko kunywa ibiyobyabwenge, gukora ubusambanyi n’izindi ngeso mbi bidakwiriye umujene w'umukristu."

Emmanuel NIYONKURU wo muri Paruwasi ya Ngoma, avuga ko izi Forumu ari ingenzi cyane ku rubyiruko kuko zituma bashyira ku ruhande ibyo bahugiyemo bakegera Imana kandi bakegerana nk'abavandimwe.

Yagize ati"Kubera social media, iri kurangaza urubyiruko, hadateguwe aho duhurira nk'uku biratgora guhura n'Imana."

Iyi forumu ije nyuma ya Forumu ku rwego rw'igihugu yabereye i Kigali kuwa 23 kugera kuwa 27 Kanama 2023. Forumu mu madiyosezi zikaba zifasha urubyiruko kugerwaho n'ibyiza bya Forumu hafi yabo ku buryo butabagoye.