Urubyiruko rwo muri Diyosezi Ruhengeri rwerekeje i Runaba muri Forumu ku rwego rwa Diyosezi

Mu kiganiro Padiri Jean de Dieu Ndayisaba, ushinzwe Komisiyo y’iyogezabutumwa ry’urubyiruko yagiranye na Kinyamateka mu gitondo cyo kuri uyu wa gatatu, yayitangarije ko abajena biyandikishije kugira ngo bazitabire iyi Forumu bamaze guhaguruka mu maparuwasi yabo, bakerekeza i Runaba.

Biteganyijwe ko nyuma yo kuhagera kuri uyu wa gatatu, Forumu y’urubyiruko rwa Diyosezi Ruhengeri izatangira ku wa Kane tariki 11 Kanama 2022, igasozwa ku cyumweru tariki 14 Kanama 2022 nimugoroba, abayitabiriye bakazasubira mu maparuwasi yabo ku wa mbere tariki 15 Kanama 2022 bamaze kumva misa ya mbere yo ku munsi mukuru w’Ijyanwa mu Ijuru rya Bikira Mariya.

Forumu y’urubyiruko rwa Diyosezi ya Ruhengeri iritabirwa n’abasore n’inkumi bagera ku 1.600 baturutse mu maparuwasi yose agize Diyosezi Gatolika ya Ruhengeri. Insanganyamatsiko yayo iragira iti“ Haguruka kuko nkugize umuhamya w’ibyo wabonye. Ibyakozwe n’Intumwa 26,10”.

Muri iyi Forumu, urubyiruko rwateganyirijwe umwanya w’inyigisho, uwo ibiganiro, uwo imikino n’imyidagaduro n’uwo amarushanwa y’imbyino, indirimbo, imivugo n’umupira w’amaguru.

Komisiyo ishinzwe iyogezabutumwa ry’urubyiruko muri diyosezi ya Ruhengeri ivuga ko yifuza ko urubyiruko rwo muri iyi diyosezi rwava mu kajagari n’ibindi bikorwa bwo mu kigare birangaje abatari bake muri iki gihe , bagashishikarira kuba abakristu gatolika beza, bahamywa ukwemera n’urukundo rw’Imana mu bantu kandi abagashora imizi muri Kristu nk’uko biri mu ntego iyi diyosezi yihaye.

Mu rwego rwo gufasha urubyiruko gutera imbere mu bukristu, mu bukungu n’iterambere, Diyosezi ya Ruhengeri ifite gahunda yo gushyiraho ikindi cyiciro cya Forumu z’urubyiruko ku rwego rwa za Duwayene z’amaparuwasi, bikaba ari andi mahirwe azajya ahuza urubyiruko mu guhura rukaganira ku buzima, iterambere, ubukristu, kwiyubakira Kiliziya n’igihugu by’ejo hazaza.