Aheruka
Inkuru 2,454 zanditswe na Kinyamateka, zishyizwe mu byiciro n'ibice nk'uko ikinyamakuru kibisanzwe gikora.
Kuri uyu wa 2 Kamena 2022, Myr Nzakamwita aherekejwe na Myr Papias Musengamana, Umwepiskopi mushya wa Diyosezi ya Byumba n’abapadiri, abihayimana n’abakristu, yakiriwe mu Iseminari Nto ya Rwesero aho agiye gukomerezamo ikiruhuko cy’izabukuru.
Nyuma y’uko mu nteko rusange ya Caritas Rwanda yateranye muri Gashyantare 2022, Abepiskopi Gatolika bo mu Rwanda banzuye ko ishami ry’ubuzima rya Caritas Rwanda na Serivise y’Ubusugire bw’Ingo ya Komisiyo y’Umuryango bakorera hamwe mu rwego rwo kurushaho gukangurira abashakanye guteganya imbyaro hakoreshejwe uburyo bwa kamere, izi nzego zombi zamaze kunoza amabwiriza zizagenderaho n’integanyanyigisho izifashishwa muri ubu bukangurambaga.
Kuwa gatanu tariki ya 20 Gicurasi 2022, ku ngoro ya Bikira Mariya Umwamikazi wa Fatima mu Ruhengeri habereye ibirori byo gusoza ukwezi k’uburezi gatolika ku rwego rwa paruwasi. Ni ibirori byitabiriwe n’abanyeshuri n’abarezi babo baturutse mu bigo by’amashuri yose gatolika ari muri Paruwasi Katedrali ya Ruhengeri, Ubuyobozi bwite bwa leta bwari buhagarariwe n’Umunyamabanga Nshingwabikorwa w’akagali ka Mpenge. Insanganyamatsiko y’uyu mwaka ikaba igira iti “Kubaka no kuba mu muryango mwiza bidufashe kwigana umwete”.
Papa Faransisiko yoherereje Umwamikazi w’Ubwongereza Elizabeti wa II, ubutumwa bumwifuriza Isabukuru nziza y’imyaka 70 amaze ku ngoma, aho yahuye n’Abapapa batanu.
Ku cyumweru tariki ya 22 Gicurasi 2022, icyumweru cya 6 cya Pasika, bwa mbere muri Kiliziya y’u Rwanda hahimbajwe umunsi mukuru w’abakateshisiti. Muri diyosezi yacu, uyu munsi wahimbarijwe muri paruwasi Katedrali ya Ruhengeri aho Umwepiskopi wacu Nyiricyubahiro Musenyeri Visenti HAROLIMANA yahaye ubutumwa abakateshisiti bagera ku 194 baturutse muri paruwasi zose zigize diyosezi ya Ruhengeri mu Gitambo cya Misa cyatangiye i saa 11h30. Insanganyamatsiko y’umunsi w’umukateshisiti iragira iti : «Nimugende mwigishe amahanga yose, mubabatize ku izina ry’Imana Data na Mwana na Roho mutagatifu, mubatoze gukurikiza ibyo nabategetse byose » (Mt 28, 19).
Kuva tariki 2 -3 Mata 2022 Nyirubutungane Papa Fransisko yagiriye uruzinduko rwa gishumba mu birwa bya Malta biherereye mu Nyanja ya Mediterane, mu majyaruguru ya Afurika.
Nyuma y’uko mu mpera za 2021, Vatikani itangaje ko hari impinduka zirimo gukorwa ku itegeko rigenga inzego z’ubuyobozi bwa Vatikani, kuwa 21 Werurwe 2022 Papa Fransisiko yatangaje inyandiko yise “Praedicate Evangelium”, ikubiyemo iteka rigena imiyoborere ya Kiliziya Gatolika ku rwego rukuru rw’i Roma, rikazatangira gushyirwa mu bikorwa tariki 5 Kamena 2022.
Ku musozo w’iminsi 40 y’igisibo, abakristu gatolika bahimbaza umunsi mukuru wa mashami; inyigisho n’amasomo bitangwa kuri uyu munsi byibanda ku bintu bibiri by’ingenzi aribyo igihe Yezu Kristu yinjiranye ikuzo muri Yeruzalemu, ashagawe n’imbaga y’abantu, bamwakiranye ibyishimo, bitwaje amashami y’imikindo. Ndetse bakazirikana iminsi ya nyuma y’ubuzima bwa Yezu hano ku isi.
Mu muhango wo gusoza icyumweru cy’uburezi gatolika ku rwego rwa diyosezi gatolika ya kibungo, ku wa gatanu tariki 27 Gicurasi 2022 mu rwunge rw’amashuri rwa Mukarange Catholique, Musenyeri Oreste Incimatata Igisonga cy’umwepiskopi wa Diyosezi Gatolika ya Kibungo akaba anashinzwe amashuri gatolika muri iyi diyosezi yasabye ababyeyi kunoza imibanire hagati yabo ndetse no hagati y’abagize umuryango, kuko iyo mu muryango hari amakimbirane n’ibibazo bigira ingaruka ku myigire y’umwana uwuvukamo.
Karoti ni kimwe mu bihingwa bikoreshwa kandi bikaboneka cyane kubera byoroshye guhingwa. Zikunda kugira ibara risa na oranje, riri hagati y’umutuku n’umuhondo nubwo hari andi mabara ariko ataboneka cyane nk’umweru n’mutuku. Ifasha muri byinshi, haba mu kugabanya cholesterol mu mubiri, kurinda indwara z’umutima no gutuma tubona neza.
Tariki ya 11 Werurwe ,2022 muri Hoteli ya Sainte Famille, Arkidiyoseze ya Kigali, habereye igikorwa cyo kumurika ibyavuye mu bushakashatsi ku mpamvu zitera amakimbirane mu miryango. Ni igikorwa cyateguwe n’umuryango Nyarwanda utegamiye kuri Leta witwa Nyinawumuntu, ku bufatanye na Jesuit Urumuri Center ku nkunga ya Kaminuza y’u Rwanda, na Minisiteri y’Uburinganire n’Iterambere ry’Umuryango.
Tariki 26 Werurwe 2022, Ubwo yizihizaga isabukuru y’Imyaka 16 amaze abaye Umwepiskopi wa Diysezi ya Kabgayi, Myr Smaragde Mbonyintege yahaye umugisha Shapeli yitiriwe Bikira Mariya w’i Fatima yubatse i Gahogo ahirengeye umujyi wa Muhanga, nyuma yo kuvugururwa n’abakristu ba Paruwasi ya Kabgayi n’abatuye i Gahogo nk’uko bitangazwa n’urubuga rwa Diyosezi ya Kabgayi.
Ku wa kane tariki ya 24 Werurwe 2022, Musenyeri Visenti HAROLIMANA yizihije isabukuru y’imyaka 10 ishize ahawe ubwepiskopi. Kuwa 31 Mutarama 2012 Radio ya Vatikani na Radio Mariya Rwanda zatangaje ko Nyirubutungane Papa Benedigito wa 16 atoreye uwari Padiri Visenti HAROLIMANA kuba umushumba wa Diyosezi ya Ruhengeri, yimikwa tariki 24 Werurwe 2012. Intego ye iragira iti . “Twabonye inyenyeri ye” (Vidimus Stellam eius) (Mt 2, 2)
Ku mugoroba wo ku wa gatandatu tariki 26 Werurwe 2022, Ku Ngoro ya Bikira Mariya Umwamikazi wa Fatima muri Diyosezi ya Ruhengeri habereye iserukiramuco Nyafurika ry’indirimbo zisingiza Imana ku ncuro ya mbere. Ryitabiriwe n’amakorari yo mu bihugu binyuranye birimo: u Rwanda , Togo, Nigeriya, Ghana na Afrika y’Epfo.
